Белгилүү куудулдардын күлкүлүү жоруктары...

Белгилүү куудулдардын күлкүлүү жоруктарынан бир шиңгил таштайлы, жылмайып алыңыз.

Куран окуп бата кылып койдум...

Жамбыл Камчиев Жалал-Абад облусунун Аксы районунун Жаңы-Жол деген айылынын борбордук көчөсүнө мындан беш жыл мурун Жаныш Кочкоровдун аты коюлганын угуп калат. Кийин бир концерттен Жаныш Кочкоровду көргөн Жамбыл чочуп:

– Эй, энеңди урайын, сен тирүүсүңбү? – дейт.

– Эмнеге? – деп таңыркаган ырчыга:

– Мен Жаңы-Жолго барсам бир көчөгө “Жаныш Кочкоров атындагы көчө” деп жазып коюшкан экен. Өлгөн адамдын аты коюлчу эле деп сага куран окуп бата кылып койгом да, - деген экен.

Беймарал тебелей бер

Рысбек Жантөрөев абдан кичи пейил адам болгондуктан ким эмне десе эле баарына “мейли, мейли, боло берет” дей берет экен. Бир жолу Тынар Курбаналиев экөө концерттин алдында Спорт ордосунун алдында турушса Рысбектин бутун бирөө тебелеп алат. Куудулдун бутун тебелеп алып ыңгайсызданган адам:

– Кечирип коюңуз, - десе, Рысбек:

– Жок, эчтеке болбойт, беймарал тебелей бер, - деген экен.

Дарбыз жейсиңби?

Рахман Разыков менен Манас Бердибеков акчасы жок базарда жүрүшсө алдыларынан чоң дарбыз көтөргөн татынакай кыз чыгат. Аны көргөн Манас Рахмандан:

– Дарбыз жейсиңби? - деп сурайт. Ансыз да суусап дарбыздан көзү өтүп келаткан Рахман:

– Жейт элем, - дейт.

– Анда тетиги дарбызды жейбиз, - деп Манас кыздын колундагы дарбызды көрсөтөт. Ага ишенбеген Рахман:

– Жиндисиң го, аны кантип жемек элек? - дейт ишенбей.

– Азыр, карап турсаң, - деген Манас баягы дарбыз көтөргөн кыз жанынан өтүп бара жатканда катуу чочутат. Эси чыккан кыздын колунан дарбыз жерге кулап барып экиге бөлүнүп калат. Камырабаган Манас:

– Карындаш, кечирип кой, мен сени байкабай калыптырмын. Дарбызыңды чогултуп берейин, – десе берки кыз:

– Жок, жок, кереги жок, – деп кетип калат. Анда Манас Рахманга:

– Кел, эми жейли, – деп экөө экиге бөлүнүп калган чоң дарбызды суусуну канганча жеп алышат.

Силерге чай алып берейин

Жамбыл Камчиев Борончу Кудайбергенов менен Рысбек Жабировго жолугуп калат. Жамбыл Оштон гастролдоп келгенин айтып:

– Бир жерге кирип чай ичели, мен силерге чай алып берейин, – дейт.

– Гастролдон келсеңиз, сизде акча бар да, - деген Рысбек менен Борончу аны менен кафеге барышат. Кирип олтурушуп Жамбыл бир чайнек чайга буйрутма берет. Жамбылдын эсебинен курсакты кампайтып алалы деген беркилер тамак, шире буйрутма беришет. Тамакка тоюшуп, сөздөрү бүткөндө Жамбыл официант кызды чакырат да:

– Чайың канчадан? – деп сурайт.

– 10 сомдон, – деген официантка 20 сом берип:

– Булар чай ичишсе дагы бир чайнек алып келип берип кой, эки чайнектики, – деп кетип бара жаткан Жамбылга Рысбек:

– Эй, токтоңуз, тамактын акчасын төлөбөйсүзбү? – десе, Жамбыл:

– Мен силерге тамакты убада кылган эмесмин, “чай алып берем” дегем, убадама турдум, - деп камырабай басып кетет.

СПИД - болбогон ушак

Жамбылга жолугуп калган Абдылда Иманкулов:

– Таз баш, кандайсың, эмне кылып жүрөсүң? – десе, Жамбыл:

– Эмне кылып жүрмөк элем, илимий иштер менен жүрөм.

– Энеңди урайын, каяктагы илимий иш, ошондон көрө өзүңдү эптеп албайсыңбы?

– Мисалы, мен СПИД оорусун изилдеп чыктым. Ал болбогон эле ушак нерсе, андай оору жок экен.

– Кантип жок болсун, эй, – деп таң калган Абдылдага:

– Чын, Абдылда, болсо эмгиче сен ооруйт элең го, – деген экен.

Кара короз эмне кылып жүрөт?

Тойдон келген Абдылда Иманкуловдун эртеси эртең менен ичи ачышып ойгонуп аялына:

– Чыз-пыз кыла кой, - дейт.

– Эт алып келе койчу, – дейт аялы.

– Койчу, жумурткадан эле кууруй кал.

– Жумуртка жок.

– Эшиктин алдында 15-20 тоогуң жүрөт го.

– Алар туубай атат.

– Энеңди урайын, кара короз эмне кылып жүрөт? – десе, аялы:

– Кара короз экөөңөрдүн эмне кылып жүргөнүңөрдү кайдан билели, – деп куудулду бырс күлдүргөн тура.

“Нормальный” адам бир көргөндө түшүнөт

Рахман Разыков “Бешилик” тобунун концертин бергенде Расул Маматкулов келип сахнадан куттуктап калат:

– Рахман аке, мурда он күн концерт бердиңиз эле, он күн катар келип көргөм. Эми да он күн койдуңар, дагы он күн катары менен көрдүм. Зор топ түзүптүрсүз, – деп ырдап барып залга олтуруп калат. Андан кийин Рахман сахнага чыгып:

– Расул, ордуңдан туруп койсоң, – дейт, Расул турса, - он күн көрдүңбү? - деп сурайт.

– Ооба, эмне болду?

– Айтам да, “нормальный” адам бир көргөндө түшүнөт, – дептир.

Беш бука байлап койсоң...

Рахман Разыков “Бешилик” тобун ачып атканда Абдылда Иманкулов:

– Рахман, койчу эй, бул балдарыңдан эч нерсе чыкпайт, андан көрө беш бука байлап койсоң, ошону этке тапшырып кичине пайда табасың, – дейт. Кийин “Бешилик” тобу популярдуулукка жеткенде Рахман:

– Көрдүңбү, кандай болду бул жагы? – десе, Абдылда беймарал:

– Эми, Рахман, мен билген жокмун да, сенин боктон шоколад жасарыңды, – дептир.

Ар бир айдын алтысы такыр жакпайт

Куудулдар уюштурган “Ар бир айдын алтысы” концерти болуп жаткан учурларда чогулуп олтурушуп сөздөн-сөз чыгып ыраматылык Жаныбек Алыкулов:

– Мага ар бир айдын алтысы такыр жакпайт, – дейт. Анда Абдылда:

– Эмнеге жакпайт? Ал күнү биз концерт беребиз, биздин концерт бергенибиз сага жакпайбы? – дейт.

– Анткени ар бир айдын алтысында мен насыя төгөм, – деген экен.

БУЛАК lady.kg